اخر الاخبار

قصيدة .. الشهيد

قصيده  الشهيد
مهداه الي الشهيد نور
اخترت لوحدك سكه جديده
عيشه سعيد
علي عيني وراسي يانور
لكن انا راح اقول ايه لبناتك
لما يسالوا عنك
لما يقولوا وديت بابا فين
قولي يانور
مين حيلم الناس في صلاه الجمعه ويخطب فيهم
مين حيضم يتيم 
اه يانور
ياابو طله رقيقه بريئه زي الحب
اخترت لوحدك
ريحه الجنه
واللي سلبك برصاصه رخيصه حياتك وطريقك
لسه في الخدمه بيضحك عايش بيربي عياله
قولي يانور طعم الموت ازاي 
طعم الحب ازاي
وانت بتحضن حزن الارض 
كان احساسك ايه
هل شفت الزنازين مفتوحه ومصر بتضحك
هل شفت الصدق لاول مره موجود في بلدنا
هل حسيت بالرهبه 
ودماك بيطهر فجر بلدنا
بترجع فينا العزه
قولي يانور ليه شايفك زعلان مكسور
انا عارف
احنا ماجبناش حقك هبتك
يعني لسه الوسطه 
لسه الكدب بيفرد ليله علي بلدي 
هل جبنالك وعدك لينا
يعني مافيش طوابير للعيش
ولا مخبر ارعن  مستاسد  وعوايد علي شقه قديمه في عبدالقادر
يعني مافيش كارت ووسطه
يعني مروان ابني ممكن يتعين في البترول 
او يبقي وزير 
او يدخل حتي ضابط في الجيش والشرطه
او يبقي شيخ للازهر
يعني مافيش تفرقه في الدين واللون
قولي يانور 
انا متلجلج خايف 
نفسي اوفي بوعدي ليك
نفسي اخلي بلدنا حره

Comments

comments

اضف رد

لن يتم نشر البريد الإلكتروني . الحقول المطلوبة مشار لها بـ *

*